پی ایچ ایف صدر محی الدین احمد وانی کا انڈر-18 ٹیم کو خراجِ تحسین، نوجوان کھلاڑیوں کو پاکستان ہاکی کا روشن مستقبل قرار دے دیا

انہوں نے کہا کہ سیمی فائنل میں شکست کے باوجود نوجوان کھلاڑیوں نے غیر معمولی ٹیلنٹ، پختہ عزم اور بھرپور لگن کا مظاہرہ کر کے ملک بھر کے ہاکی شائقین کے دل جیت لیے۔ ان کا کہنا تھا کہ نامساعد حالات کے باوجود کھلاڑیوں نے میدان میں جس تال میل، مہارت اور آخری سیکنڈ تک لڑنے کا عزم دکھایا، وہ قابلِ تعریف ہے۔

یاد رہے کہ انڈر-18 ہاکی ایشیا کپ کے سیمی فائنل میں بھارت نے پاکستان کو 3 کے مقابلے میں 5 گولز سے شکست دی۔ اس شکست کے بعد پاکستان اب تیسری پوزیشن کے میچ میں ملائیشیا کے خلاف میدان میں اترے گا، جبکہ فائنل میں بھارت اور جاپان آمنے سامنے ہوں گے۔

اس سے قبل پاکستان نے کوارٹر فائنل میں بنگلہ دیش کو 5-2 سے شکست دے کر سیمی فائنل کے لیے کوالیفائی کیا تھا۔

فیڈریشن کے مطابق یہ ٹیم ایونٹ سے صرف چند ہفتے قبل تشکیل دی گئی تھی، جس کے باعث کھلاڑیوں کو مشترکہ تربیت اور باہمی ہم آہنگی کے لیے بہت کم وقت ملا۔ مزید یہ کہ ٹیم میں شامل اکثر کھلاڑیوں کے لیے یہ پہلا بڑا بین الاقوامی اور انتہائی مسابقتی مقابلہ تھا۔

محی الدین احمد وانی نے کہا کہ ہر نئی ٹیم کی طرح اس اسکواڈ سے بھی کچھ غلطیاں ہوئیں، تاہم یہ تجربہ سیکھنے اور آگے بڑھنے کا حصہ ہے۔ انہوں نے کہا کہ ان نوجوانوں نے ثابت کر دیا ہے کہ پاکستان کے پاس ہاکی کے لیے باصلاحیت نئی نسل موجود ہے۔

پی ایچ ایف صدر کے مطابق فیڈریشن ان کھلاڑیوں کی مکمل حمایت جاری رکھے گی اور انہیں مزید بین الاقوامی مواقع، جدید تربیت اور بہتر سہولیات فراہم کی جائیں گی تاکہ وہ قومی اور عالمی سطح پر پاکستان کا نام روشن کر سکیں۔

ان کا کہنا تھا کہ ہم اپنے ان بچوں پر فخر کرتے ہیں جنہوں نے سبز ہلالی پرچم کے لیے جذبے، حوصلے اور وقار کے ساتھ کھیل پیش کیا۔ ان کا سفر ابھی شروع ہوا ہے، یہ اختتام نہیں۔